28.4.11

පෙම්වතෙකුට හූ කිවුවෙමි.


"නෝනා වරුනි මහත් වරුනි සහෝදර සහෝදරියනි ........................විසින් 7 වෙනි වරටත් සංවිධානය කරනු ලබන මහා බක්මහ උලෙළ සඳහා ඔබ සැම සාදරයෙන් පිළිගනිමු"

ලවුඩ්ස්පීකර් කීපයකින්ම ඇහෙන්න පටන්ගත්ත ඒ කෙල්ලෙකුගේ සියුමැලි කටහඬට මම මොහොතක් හොඳට කන් දීගෙන හිටියා . ඇඳේ කොට්ට ගොඩක් මැද නිදාගෙන හිටපු මම ඇඳෙන් නැගිටලා ජනේලය ගාවට ගිහිල්ලා ආයෙමත් ඒ ඇහෙන හුරු පුරුදු කටහඬට කන් දුන්නා.....

එයාද ?

ඔවු ! එයාම තමයි . මේ ලෝකේ ඕනෑම හඬක් අතරින් මට ඒ සියුමැලි කටහඬ වෙන් කරලා අඳුරගන්න පුළුවන් .මට හොඳටම විශ්වාසයි .. කතා දෙකක් නෑ ඒ එයාමයි !

මාස කිහිපයකට උඩදී මගේ කන් දෙක වැඩියෙන්ම අහන්න ආසා කරපු ඒ හුරතල් කටහඬ මේ දැන් මට මගේ ගමේ අවුරුදු උත්සවයෙන් ඇහෙනවා .! මගේ ගමේ අවුරුදු උත්සවයේ නිවේදන කටයුතු . මගේ හිටපු කෙල්ලට බාරදීලා ! ඉතින්.....එදා මගේ කනට කරලා රහස් කොඳුරපු ඒ කටින් අද මුලු ගමටම අමතන්නයි මගේ හිටපු ආදරවන්තිය සූදානම් වෙන්නේ ! .. මටත් පොඩි හිනාවක් ගියා . ටිකෙන් ටික අවුරුදු උත්සවය පැත්තෙන් ඇහුණ ඒ සියුමැලි කටහඬට තවත් එක කටහඬක් එකතු උණා ! . පිරිමි කටහඬක් ! .. පිරිමි කෙනෙකුත් නිවේදනයට ඇවිදිල්ලා !

"කමක් නෑ .ඔන්න ඔහේ එනවුන්ස් කරපුදෙන් ! මගේ ඇඟේ වදිනවැයි"

මම එහෙම කියලා හිතලා සැනසුනා ! .

ටිකෙන් ටික උදේ ගෙවිලා මද්දහනෙට ඉර මුදුන් වෙන්නයි හදන්නේ ! ..... අවුරුදු උත්සවයත් ජයටම නැගලා යනවා . පැත්තට ගිහිල්ලා මගේ අතිජාත මිතුරු සේනාව සමග එකතු වෙන්න පුදුම අසාවකුත් මට නැතුව නෙවෙයි . ඒත් . . මොකද්ද මන්දා අමුතු හැඟීමක් යටි හිතේ තෙරපෙන හින්දා මෙදා පාර මට ඒ පැත්තට යන්න කිසිම ආසාවක් නෑ ..ඒත් ගියපාර අවුරුදු උත්සවේදී මමයි මගේ යාළු මිත්‍රයෝ සේනාවයි කරපු විකාර වැඩ එකින් එක මතකෙට එනකොට . මේ විදිහට පැත්තකට වෙලා ඉන්න කොහොමටවත් හිත දෙන්නේ නෑ

"දැන් මොකද කරන්නේ රේඩියෝ කට්ටවත් දාගෙන වැඩිකරගෙන අහනවා...... එහෙම හිතලා සාලේ පැත්තට යන්න . පුටුවෙන් නැගිටා විතරයි !

"ඇන්ටී .. ඇන්ටී .. සඳරු ඉන්නවදෝ"

අන්න මගේ පාප මිතුරු සේනාව මාව හොයාගෙන ඇව්ත් . දැන් ඉතින් නිවාස අඩස්සියේ හිටපු කාලසීමාව අවසන් .. මමත් අම්මා එන්න කලින් ඉක්මනට ඒ හඬ එන පැත්තට ගියා

"සඳරු අන්න උඹගේ පරණ කෑල්ලයි ඒකිගේ අලුත් ලවු එකයි . ඉස්ටේජ් එක උඩ ජෝගි නටනවා !

"මොකක් කීවා ඒ ඩිංගට තව එකෙක් එක්ක ...................?

"වරෙංකො යන්න... අනිත් එවුනුත් උඹ එනකම් බලං ඉන්නේ . ඉකමනට ලැහැත්ති වෙලා වර"

"
හරි උඹලා ඔහොම ඉඳපලා ගෙට එන්න ඕන නෑ .. මම විනාඩියෙන් එන්නම් …”

ගේ ඇතුළට දුවලා ගියපු මම ඇඳන් හිටපු ඇඳුමටම අස්ප ලාඩං දෙක වගේ ගෙවිච්ච මගේ සෙරෙප්පු කටු දෙක දාගත්තා.... කලු නයිට් ජෙල් ඩිංගක් උලාගෙන කොණ්ඩේ බෙකම් වගේ හදාගත්තා .මුල්ලක තිබිච්ච ෆෝන් එකත් සාක්කුවට දාගත්තා අම්මා හංගලා තිබිච්ච මගේ මුදල් පසුම්බියත් හොයලා අරගත්තා ,! ක්‍රියාදාම චිත්‍රපටයක ප්‍රධාන නළුවා අවසන් මෙහෙයුමට යන්න සූදානම් වෙනවා වගේ . මමත් ඒ අවුරුදු උත්සවයට යන්න සූදානම් උණා !

මගේ හිතේ මහා ලොකු කුතුහලයක් තෙරපෙනවා .

කවුද එයාගේ අළුත් ආදරවන්තයා ?
 
මට වඩා වැඩ්ඩෙක්ද ?

මට වඩා හැණ්ඩියෙක්ද ?

ජොබක් කරනවද ?

එයාව රවට්ටනව වත්ද ?

උසස්පෙළ ප්‍රතිඵල නිකුත් වෙච්ච දවසේවත් මගේ හදවත මේ තරම් ගැහුණේ නැතිව ඇති . ගේටුවෙන් ඇතුළට ගිහිල්ලා . පිට්ටනිය පුරාම හිටපු කොල්ලෝ කෙල්ල්ලෝ අංකල්ලා ඇන්ටිලා අතරින් . මාව ඇදගෙන මගේ යාළුවෝ ඉස්සරහටම ගියා . වේදිකාව ළඟටම

ඉතින් ඒ මොහොත උදා උණා . බිම බලාගෙන හිටපු මම හෙමීට ඇස් දෙක ඇරලා . ස්ටේජ් එක උඩ හිටපු පුංචි නිවේදිකාව දිහා බැලුවා.... මම කලින් ආදරේ කරපු .හිස් අහස බ්ලොග් එකේ පිටු පුරවාපු . මගේ ජීවිතේට අරමුණක් දීපු . පුංචි කෙල්ලව ආයෙමත් වතාවක් බලාගත්තා . රන්වන් පාට ළමා සාරියකින් සැරසිලා හිටියේ... එදා කෙනාමයි

ඊටපස්සේ මම හෙමීට ඔළුව හරවලා . දකුණු පැත්තේ හිටපු අනිත් නිවේදකයා ඒ කියන්නේ මගේ හිටපු කෙල්ලගේ අළුත් පෙම්වතා ! එයාව බලන්නත් මම ඔළුව හැරෙවුවා

මෙතැන් සිට සියලුදේම ලියැවෙන්නේ ..පැරදුණු පෙම්වතෙකුගේ දෘෂ්ටි කෝණයෙනි !

හද්ද පරණ සරමක් අඳගෙන...බුජාලා වැඩියෙන් යොදාපු සුදු කමීසයකින් සැරසිලා කොණ්ඩේ තෙල් ගාලා මදින් බෙදාපු කොල්ලෙක් මයික් එකක් අතේ අරගෙන ඉන්නවා මුහුණවර හරියටම. සිම්බාබ්වේ ක්‍රිකට් කණ්ඩායමේ කඩුලු රකින ක්‍රීඩකයාගේ වගේමයි !

"මූද බං එයාගේ අලුත් කොල්ලා . බලහංකෝ මුගේ හැටි" ! මම අත දික්කරලා මගේ යාළුවන්ට පෙන්නුවා

" උඹට පේන විදිහනේ බං . මූ තමයි අහවල් වේදිකා නාට්‍යයේ . පැනියාගේ චරිතය රඟ දක්වලා ජාත්‍යන්තර සම්මානයට පාත්‍ර උණේ . උඹට වඩා නම් හැණ්ඩියෙක් බං !

"අනේ උඹලෑ ඇස් පේන්නේ නෑ . මූ මොකෙද්ද ?

"නෑ නෑ බං ඉරිසියාවට උඹගේ ඇස් අන්ධ වෙලා තියෙනේ ඒකයි . කෙල්ලගේ අම්මයි තාත්තයි දෙන්නම ඔන්න සම්බන්දෙට කැමත්තත් දීලා"

මගේ යටි බඩ සිසිල් වේගෙන ගියා . මෙච්චර කල් ආදරේ කරපු මට කැමැත්ත නොදුන් ඒ දෙමවුපියෝ කොහේවත් ඉන්න කොල්ලෙකුට කැමැත්ත දීලා ! ඒත් මගේ හිතට පොඩ්ඩක්වත් දුකක් දැනුණේ නෑ . මොකද කියනවා නම් මම දැන් මේ සේරම දේවල් අතීතයට එකතුකරලා ඉවරයි . ඒත් මොකද්ද මන්දා මහ අමුතු හැඟීමක් මේ මොහොතේ ඉඳන් මගේ හිත ඇතුළේ කැලැත්තෙනවා .

"සඳරුවා මොකද බං මූඩ් ගහලා ?

"පිස්සුද බං

උඹට ඉරිසියයි නේද මචං .?

නෑ කියන්න හිතුණත් ඒ වෙලාවේ මගේම යාළුවෝ ඉස්සරහා මොකට බොරු කියනවද කියලා මට හිතුණා

"
හ්ම්... අම්බානෙට ඉරිසියයි බං"

මොහොතකින් මගේ වටේ හිටපු යාළු මිත්‍රයෝ එක එක අදහස් දෙන්න පටන්ගත්තා .

"අපි එහෙනම් මූට හූවක් දාමු . පොඩි මිස්ටේක් එකක් වෙනකම් ඉඳලා ඌට මයික් එක දාලා දුවන්න හූ කියමු . එතකොට උඹට සැටිස් බං"

මගෙත් මූණේ හිනාවක් ඇඳෙන්න ඇති . මමත් එක පයිං ඒ යෝජනාව ස්ථීර කළා .!

"හරි මෙතන ඉන්න අපි සේරමලා එකපාර ලොකු හූවක් දාමු . අරපැත්තේ ඉන්න එවුනුත් එතකොට එල කැඩෙන හූවක් තියාවි"

ඉතින් මම ආත්මාර්ථකාමියෙක් වෙන්න ඇති ඒත් මගේ හිතේ මොහොතකට නැගිච්ච ඒ ඉරිසියාව හැමදේකටම වැඩිය ලොකුයි මම මේක කරන්නම ඕන !

ඉතින් මගේ පුංචි ආදරවන්තියගේ බ්‍රෑන්ඩ් නිවු පෙම්වතා එක වචනයක් යන්තමින් වරද්දගන්නකම් අපි විනාඩි 15 විතර බලාගෙන හිටියා................................. අන්තිමේදී අපි බලාගෙන හිටපු ඒ සුන්දර මොහොත උදා උණා

මොහොතේම මගේ ගමේ හොර පොල් කඩන අංකල් කෙනෙක් ලිස්සන ගහ මුදුනටම නැගලා කොඩිය ගත්තා . එතකොටම අපේ ඉලක්කය වෙලා හිටපු නිවේදක පෙම්වතා . එකවරම ෆෝම් වුණා
 
ඔවු මෙන්න පිළිගන්න ලීස් ගහේ මුදුනටම ගිය ඒ ජයග්‍රාහකයා !

මම හිතන විදිහට ග්‍රීස් ගහයි ලිස්සන ගහයි කියන වචන දෙකම එකවර කියැවෙන්න ගිහිං .. පෙම් බුවාගේ කටින් පිටවුණේ ලීස් ගහ කියන වචනය !

අපිට ඒ හොඳටම ඇති .. එක වරම පිරිස මැද්දෙන් නැගපු හූ හඬට අහල පහළ ගම්මාන හතක් හෙලවෙන්න ඇති . හිතේ දහසක් හැඟීම් හිරකරගෙන හිටපු මම ඒ සේරම හැඟීම් හූ හඬකට පෙරළලා . හුළඟේ පා කරේ පුදුම ආතල් එකකින් . මම මගේ ජීවිතේට ඒතරම් හයියෙන් හූ කියලා නැතුව ඇති ...

"ඇඩෝව් ඊයේ රෑට කෑවේ ලීක්ස් දෝ ??

මෙන්න නිවේදකයක්ට ලූස් හැදිලෝ .! ! ! ! !

කොල්ලෝ සේරම තව තව වචන දාලා කෑගහන්න ගත්තා . ග්‍රීස් ගහ මුදුනේ හිටපු කොඩිය ගත්ත ජයග්‍රාහකයා පවා හිනහ වේවී පහළට එන අතරේ . ගමේ අවුරුදු උත්සවේට ආපු වයසක සීයාගේ ඉඳලා . පොඩි දරුවා වෙනකම්ම විනාඩියක් විතර හිනහා උණා .හැබැයි දෙන්නෙක් ඇරෙන්න .. කටවල් කජු ලෙලි වගේ කරගත්ත. මොහොතකට ගොළුවෙච්ච නිවේදක ජෝඩුව ...සද්ද නැතුව මොහොතක් හිටියා ...නිවේදක පෙම්වතාටනම් ඇපත් නෑ . එයා හරිම ලැජ්ජාවෙන් හිනා වෙන්න උත්සහ කළත් ඒ හිනාව බලෙන් මවා ගත් හිනාවක් කියලා හිටපු හැමෝටම පෙනුණා සමහර අය නැවත නැවත හූ කියන්න ගත්තා . නිවේදක බුවා මයික් එකට පිඹිනවා . මයික් එක වැඩ නෑ වගේ රඟපානවා . එක කෙලියයි...

වේදිකාව උඩ ඇස් දෙකක් මගේ දිහා බලාගෙන ඉන්න බව මම දැක්කේ මොහොතක් ගියාට පස්සේ . මාව දවලා අළු කරන තරමේ නපුරු බැල්මක් දීගෙන හිටියේ .. මීට මාස ගාණකට කලින් මගේම ආදර කථාවේ මගේ ආදරණීය පෙම්වතිය වෙලා .මගේ ලෝකයම මගේ ජීවිතයම වෙන්න පොරොන්දු වෙලා මගෙත් එක්ක හිටපු අද මගේ හිටපු පෙම්වතිය වන ඇය... මගේ හිනාව ඒ මොහොතේම අතුරුදහන් උනා .!

මේක ලියන දැනටත් මම එයා එක්ක තරහ නෑ . හැබැයි මෙගේ හිතේ කොනකවත් ආයේ එයා ගැන අංශුමාත්‍රයකවත් ආදර හැඟීමකුත් නෑ . මම එයා ගැන හිතන්නෙත් නෑ . අදින් පස්සේ එයා කවුරු එක්ක හිටියත් මට කමකුත් නෑ !

ඒත් එයා වෙන කෙනෙක් එක්ක ඉන්නකොට මට දැනෙන හැඟීමට කියන්න නමකුත් මම තාම දන්නෙ නෑ ! .



සඳරු //
Image[ http://raptorsrepublic.com/wp-content/uploads/2010/04/booing.jpg ]

23.4.11

"නරි නන්ද" කතා වස්තුව






නෝනා වරුනි මහතුනි අවසර  දෙන්න
සත් කතාවක් කවියෙන්  පවසන්න
එපා ඉතින් කියවා බැණ බැණ යන්න
සඳරුට බැහැනෙ සුන්දර කවි  ගළපන්න

දුප්පත්කමෙන් උපරිමයෙන් දුක් වින්ද
ගම්මානයකි එහි නම නුගේ ලන්ද
කරුණක් නිසා එහි වූ අති පර සිද්ද
ගැමියෙක් හිටියා ඔහුගේ නම "නරි නන්ද"

ඔහු කිසි දිනක පෑනක් අල්ලලා නැතී
වරුසාවකට වත් පාසල් ගිහිං  නැතී
අත පය නම් සවියෙන් අඩුවක් නොමැතී
ඉන්නට බලෙන් අල්ලාගත් ගෙයක්  ඇතී

දැලි පිහියක් ඉනේ ගහගෙන ඉන්නේ
මරුමුස් ගතිය මූණෙන් පිළිඹිබු වෙන්නේ
මිනිහගෙ වැඩ එතෙකින් නෑ නිම වෙන්නේ
ඔහු දෙන ගේම් ඉදිරියටයි ලියවෙන්නේ

දවල් වරුව එලි පත්තක බුදියන්නේ
හවසට තමා මිනිහා වැඩ අරඹන්නේ
හොඳට ඉරුණු සරමක් ගෙන ඇඳගන්නේ
ගෑනුන් නාන තොටුපළ ගාවට යන්නේ !                                 

නාන තොටට බරවුණු ලොකු ගහක් යට
ඉඳගෙන මුවාවී හබරල පඳුරකට
මොනවද කලේ ඔහු තනියම එතන සිට
ස්ව්යං රැකියාව බව කිසිවෙක් කීය මට

වලා උනත් මිනිහා සිරියා වන්තයි
ඒක නිසා මිනිහට ගෑනුත් පොරකයි
පෙනී නාන්නට හැම ගෑනිම ආසයි
ඒක නිසා මිනිහා රජ සැප ගත්තයි

 
සැමියන් දැනං උන්නත් මේ බව නිතර
දැලි පිහියට බයෙන් කට වැහුවයි  නිතර
ගෙවල් වල ෂවර් ඇති ගෑනුත් නිතර
ළිඳෙන් නාල යයි පෙන්වා ඇඟ නිතර

-----------------

ගම්මානයේ සෙබලෙකි හැම සිත් ගත්ත              
ගිනි අවියක් කර මත රඳවා ගත්ත
ආමි බුලට් යැයි නමකුත් ලැබ ගත්ත
සී අයි ඩී එකෙත් ඉඳ පැන්ෂන් ගත්ත


දින සති මාස ඔය ලෙස යයි ගෙවීලා
මේ අවලං ජොබ් එක යයි නැගීලා
දවසක් නරි නන්ද ගැන සැක හිතීලා
ආමි බුලට් යයි පස්සෙන්  හඹාලා


බුලට් නරි නන්ද පසු පස්සෙන් යන්නේ
අවලං වැඩේ සියැසින් දැක ගන්නේ
විතරක් නෙවේ තව ඇත්තක් පෙනුනේ
බුලට් ගෙ බිරිඳත් ළිඳ ළඟ නානවනේ !


තමන්ගෙ ගෑනි අවලමෙකුට නතු වෙද්දී
ඉන රැඳි ගිනි අවියට අත ලං වෙද්දී
පිරිමි හදවතක් කෝපෙන් පිපිරෙද්දී
අනේ ඇහුණාද පිපිරුව වෙඩි, හඬ දී ?


ලියන්න බැරි තැනකට උණ්ඩය  වැදිලා
නන්ද මිය ගියා නරියෙකු ලෙස  වැටිලා
පොලීසියෙන් ආවත් යන්නට කුදලා
බුලට් හිටියා පිහියෙන් ඇනගෙන මැරිලා !

කවි සිතිවිලි නොම හඳුනන සිතක
සිතිවිලි නැගුණි අඩියක් දාගත් විටෙක
අසූ අටේ මම ඉපදී නැති කලක
මෙච්ච සිද්දියකි අපෙ අල්ලපු ගමක


සඳරු//

Image  [ http://defending.com/wp-content/uploads/2009/08/criminal-homicide.jpg]

18.4.11

ලොවට හොරෙන් සිදුකළ මගේ කසාදය

          මීට මාස හයකට කලින් හිස් අහස කියලා විකාරම නමක් දාගෙන පුංචි බ්ලොග් එකක් හදලා . සිංහල අකුරු එකින් එක විකාර විදිහට අමුණමින් කාලයක් ගෙවුණා ........ .මම අද මේ හිස් අහස බ්ලොග් එකේ ලියන පනස් වෙනි ලියවිල්ලත් සම්පූණ කරන්නයි හදන්නේ .
මගේ ජීවිතේ මම ගත කරපු අවුරුදු 22 න් වැඩි හරියක්ම මම ගත කරේ කිසිම කෙනෙකුට ප්‍රයෝජනයක් නැති කාලකන්නියෙක් විදිහට . සහතික ඇත්ත මම ජීවිතේ විඳින්න උත්සහ කරා !. උපරිමයෙන් විඳින්න උත්සහ කරා. අන්න ඒ හේතුව නිසා මම මගේ ජීවිත කාලයෙන් වැඩි කොටසක් නිකරුණේ කාල දැම්මා .ඒත් මම මේ ගතකරපු අවුරුදු 22 කාලය ඇතුළේ මම කරපු මෝඩ වැඩ , මට වැරදුණ තැන්. මගේ කාලකණ්නි ජීවිතය ගතවෙච්ච හැටි කිසිම කෙනෙකුට නොකියන්න මම හිතාගෙන හිටියා. ඒත් ! ඒත් මට වැරදුනෙත් අන්න එතන .

"ප්‍රශ්න ගැටලු ආවම ඒවා හිතේ තියාගෙන ඒව ඉවසගන්න පුළුවන් මිනිහා අති දක්‍ෂයෙක් !
 
මම එහෙම. හිතාගෙන වේගයෙන් හමාගෙන එන කාලය කියන කුණාටුව ඉස්සරහා සද්දන්ත ගහක් වගේ ඉන්න උත්සහ කරා. අන්තිමේදී මම මම පරදින්න ඇති . මම අසාර්ථක මිනිහෙක් වෙන්න ඇති .මම පැරදුණත් අසාර්ථක උණත් ඒ බව පිළිගන්න අදටත් මගේ හිත මට ඉඩ දෙන්නේ නෑ . මගේ හිත ඒ තරම්ම උද්දච්චයි ! අදටත් . මේ දැනටත්. ඒත් මේ බ්ලොග් එක නිසා මම මගේ ජීවිතයේ දුර්වලකම් අඳුරගත්තා . මට වැරදුණ තැන් අඳුරගත්තා .මගේ හිතත් එක්ක මම කතාකරන්න ඉගෙනගත්තා ! . 

කෙනෙක් ඉදිරියට ඇවිල්ලා මගේ වැරදි ඇඟිල්ලක් දික්කරලා පෙන්වනකොට මම කවදාකවත් ඒ වැරැද්ද පිළිගන්නේ නෑ !. මම කිසිම දවසක වැරද්දක් පිළිගන්න මිනිහෙක් නෙවේ .! මට උපදෙස් දෙන එක නිකම් වචන නාස්ති කිරීමක් විතරමයි .

"යකෝ ඕක වැරදියි . උඹ හැදියං ! අහවලා ගැන හිතලා වත් හැදියං !

ඔය වගේ කවුරුහරි මට සද්දේ දානවානම් . මොහොතේ කරච්චලෙන් බේරෙන්න .මම මොහොතකට .මැටි ගොඩක් බවට පත් වෙනවා. හරීම හොඳ නිහතමානී දරුවෙක් වගේ. මාව ගොඩගන්න හදන ඒ පුද්ගලයා කියන දේ අහගෙන ඉන්නවා . ඒත් මගේ හිතට යන්තම්වත් තට්ටු කරන්න ඒ වචන ප්‍රමාණවත් මදි . එත් හිස් අහස බ්ලොග් එකේ බ්ලොග් පිටුවල HTML Cord අතරේ . සිංහල Unicode වලින් . මම මගේ ජීවිතේ ගලාගෙන ගිය හැටි ලිවුවා . මමම ලියපු අන්න ඒ මගේ කතාව දැකලා මම මොහොතකට ගැස්සුණා !.

"මේ ලියාගෙන යන දේවල් ඇතුළේ උඹට සතුටු වෙන්න පුළුවන් එකම එක දෙයක් වත් ලියවුණාද ?

මගේ හිත මගෙන්ම අහනවා !

ඇත්තටම නෑ ! ලියැවෙන තරමක් ලියැවුණේ මම පරාද වෙච්ච හැටිමයි . මම මගේ ජීවිතේ ජයක් ලබාපු දවසක් මට මතක් කරන්නත් අමාරුයි .

ක්‍රිකට් ගහන වෙලාවේ ගහපු හයේ පාරවල් ! , යාළුවෝ බීල බිම වැටෙද්දී වැඩිපුරම බීපු මම විතරක් කෙළින් හිටපු හැටි, වලි වලට ගිහිල්ලා ගහගෙන ආපු හැටි . ඔන්න ඕව තමයි දිනුම් ! මම හිතාගෙන හිටියේ එහමයි . ඒත් ඒව ජයග්‍රහණ නෙවෙයි . ඒව නිකම්ම නිකම් මතක සටහන් විතරමයි ! ඔන්න ඔය කියන යථාර්ථය මට පෙන්නලා දුන්නේ . මෙන්න මේ බ්ලොග් එක
 
මගේ ජීවිතයේ මම කරපු දේවල් . මම මුහුණ දීපු අද්දැකීම් . මම ටයිප් කරලා . ආයෙම වතාවක් මමම කියවනකොට මගේ ජීවිතේ වැරදි කරපු තැන් මම තේරුම් ගත්තා . කරපු වැරදි වල සයිස් එකත් තේරුම් ගත්තා . නිකරුණේ කාලා දාපු කාලය ගැනත් . යාළුවෝ කියලා ආශ්‍රයකරපු අමනුස්සයෝ ගැනත් හොඳාකාරවම තේරුම් ගත්තා . වෙන කෙනෙක් මේ දේවල් මට පෙන්වලා දෙන්න ගියානම් . මම නෙවෙයි යන්තමටවත් ඒවා ගානකට ගන්නේ . ඒත් මම ලියපු මේ ලියවිලි නිසා . මම මාව අඳුර ගත්තා. ඉතින් අන්න ඒ නිසා මේ බ්ලොග් එක පටන්ගත්ත එක මම මේ ජීවිත කාලේ කරපු වැදගත්ම වැඩේ කියලත් මොහොතකට හිතෙනවා .
හිස් අහස බ්ලොග් එක පටන් අරගෙන දැන් මාස හයක් වෙනවා .! මට මාස හයක්ම ගියා ලිපි පනහක් ලියන්න. හිතට එන හැම දේම මේකේ ලියන්නත් බෑ . මගේ ජීවිතේ මම හංගගෙන ඉන්න කැමති රහස් ගොඩක් තියනවා . වැරදීමකින්වත් ඒ දේවල් නොගෑවෙන්න . කාටවත් කරදරයක් නොවෙන්න අකුරෙන් අකුර තෝරලා බේරලා හෙමිහිට ලියන නිසා මට ලිපි පනහක් ලියාගන්න මාස හයක්ම ගියා .

මේ ලියපු ලියවිලි හතළිස් නවයෙන් . මම ගොඩක් දේවල් උපයාගත්තා . සල්ලි එහමනම් නෙවේ ! යාළුවෝ ගොඩක් කමෙන්ට් ගොඩාරියක් . උපදෙස් ගොඩක් . එක්කම පුංචි සතුටකුත්

එහෙනම් කමෙන්ට් දුන්න . ආවගිය ඔය හැම කෙනෙකුටම ගොඩක් ස්තූතියි .ස්තූතියි කියන වචනෙත් පුරුදු උණේ බ්ලොග් එක හින්දමයි .ඉතින් ඔන්න ඔය කොහොම කොහොම හරි මම පෝස්ට් පනහක් ලියුවා ! ඔය ගැන හිතනකොට මට මෙහෙමත් හිතුණා මන් දන්නෑ ඒ හිතිච්ච විකාරේ බලන ඈයෝ කොහොම දකීවිද කියලා !

මට නිකමට හිතුණා සයිබර් ලෝකයේ මගේ සහකාරිය මේ බ්ලොග් එක කියලා ! .මෙයා මාව කොයි තරම් හොඳට තේරුම් ගත්තද ? මගේ වැරදි කොයි තරම් මට පෙන්වලා දුන්නද ?

ඉතින් මම තීරණය කරා . මම තීරණය කරා . මේ දැන්ම මගේ සයිබර් සහකාරිය එක්ක විවාහ වෙන්න .

දැන් වෙලව රෑ 12:30 පැනලා .

ඉතින් මගේ බ්ලොග් සුන්දරියේ................අදයි අපේ කසාදේ !

ජය මංගල ගාථා නෑ.
නගින්ඩ පෝරු නෑ .
මගුල් කන්ඩ හෝටල් නෑ .
හනිමුන් යන්ඩ පින නෑ . ..........

මට උඹගෙන් ලැබෙන දෑවැද්ද නම්

හිට්ස් තොගේකුයි
කමෙන්ට් බර ගානකුයි .
අනුගාමිකයෝ රොත්තකුයි..
උඹයි විතරයි !

ඉතින් හත් දෙයියනේ ! සිංහල බ්ලොග් අවකාසේ ඔබ තමුන්නැහේලා හැමෝම අපේ කසාදෙට සාක්කි !

අපි උත්සාහ කරන්නම් මේ බ්ලොග් අවකාසේ ඉන්න ආදර්ශමත් ජෝඩුවක් වෙන්න

මම උත්සාහ කරන්නම් මගේ අත් දෙකේ ටයිප් කරන්න හයිය තියනකම් මගේ බ්ලොග් බිරිඳව දලා නොයන්න !!

කියවන ඔබ තමුන්නාසෙලා එන්න . අපේ දුක සැප බෙදා ගන්න !

හැමෝටම ජය වේවා ! ! !


සඳරු //


.