විලංගු දැමු දෑතකින් කෙසේ ලියම්ද ?

             පහුගිය දවස් කීපයේ පුදුම නිදහසකින් මම හිස් අහසේ ඉගිල්ලුනා . හිතේ තිබුනු සේරම දුක සතුට අකුරු බවට හරවලා හිස් අහසේ පාකරා . යාළුවෝ ගොඩකුත් අඳුරගත්තා . ජීවිතයට ගොඩාක් දේවල් එකතුකරගත්තා . සමහර එපාකරපු දේවල් වලින් ඈත් උනා .

ඒත් ඒ නිදහස තවදුරටත් මගේ ලඟ රැඳිලා නෑ. දැං ඉතිං මට සිද්ධවෙන හැම දේම ඉස්සර වගේ ලියන්න බෑ . දැන් මගේ දෑතටම විලංගු වැටිලා ඉවරයි ….

මේ බ්ලොග් එකේ තියන හැම දෙයක්ම මගේ ගෙදරට ආරංචි වෙනවා . තව කාගේ කන්වලට යනවද කියලා මම දන්නේ නෑ . ඉතිං ඔත්තුකාරයෙක් මගේ බ්ලොග් එකට රිංගලා කියලා මම දැනගත්තා .

ඔත්තු කාරයා මගේම යාළුවෙක්. ගෙවල් ලඟ කෙනෙක් . කාලයක් මගේ ලඟින්ම හිටපු කෙනෙක් . මගේ රහස් මගේ දුර්වලකම් . මගේ හැමදෙයක්ම යම් තරමකට දන්න කෙනෙක් . ඒවගේ කෙනෙකුගේ කටට පන ආවොත් ! කොහොමට හිටීවිද .?

මේ බ්ලොග් එකේ ලියපු නැති ලියන්නත් බැරි ගොඩාක් රහස් මගේ ජීවිතේ තියනවා . ඔත්තුකාරයා මගේ රහස් ගැන සෑහෙන තොරතුරු දන්නවා . ඒ දැනගත්තේ මගේම වරදින්

අපට දුක්බර කාල කොයිතරම් එනවද ? .

හිතේ කොයිතරම් දුක් වේදනා පිරෙනවද ?

අපිට ඒව හිතේ තියාගෙන ඉන්න අමාරුයි .හිතේ තියාගෙන හිටියොත් වෙන්නේ අපි අපිටවත් නොදැනී ටිකෙන් ටික පිච්චිලා යන එක . හොඳම වැඩේ තමයි කාටහරි කියලා හිත නිදහස් කරගන්න එක .

දැන්නම් මට හිතේ දුක පාකරන්න . හිස් අහසක් තියනවා . ඒත් කාලෙකට කලින් මම හිතේ දුක මගේ ගැටළු මේ හැම දෙයක් කීවේ මගේ යාළුවෙකුට . ඒත් ඒ කියපු දේවල් ඒ රහස් හැම දෙයක්ම . වෙනත් කටවල් වලින් මගේම කනට ඇහෙනකොට මට දැනෙන හැඟීම මොනවගේද ?

මම මෙච්චර කාලයක් කිසිම කෙනෙකුට උපදෙස් දෙන්න ගියේ නෑ ඒත් අද මම වැටිච්ච වලේ තව කවුරුවත් වැටෙනවා බලාගෙන ඉන්න මට බෑ . ඉතිං මම අද්දැකීමෙන් කියන මේ උපදෙස් දිහා පොඩ්ඩක් බලන්න .

හිතට දුකක් ආවම ඒ දුක කාටහරි අපිට සමීපම කෙනෙකුට කියලා හිත නිදහස් කරගන්නඑක තමයි අපි ගොඩ දෙනෙකුගේ සිරිත . අපිට බොහෝ වෙලාවන් වලදී අපේ දුක්, ගැටළු අපේ පවුලේ අයට කියන්න බෑ . අපිට වඩා වයසින් වැඩි ගොඩක් අය අපේ ගැටළු දිහා බලන්නේ තරමක් වෙනස් විදිහට .අපේ ගැටළුවක් ගැන කියන්න අපි තෝරගන්නේ අපේ වයසෙම අපිට ලඟින්ම ඉන්න අපේ හොඳම යාළුවෙක්ව. එහෙම කෙනෙකුට ගැටළුව ගැන කීවාම අපේ හිත ගොඩාක් නිදහස් වෙනවා .

ඒත් පොඩ්ඩක් හිතන්න .!

අපේ දුක අපේ ගැටළු අහගෙන ඉන්න කෙනා අපි ගැන මොනවා හිතාගෙන ඉන්නවා ඇත්ද..... ?

අපි ගැන මොන ආකාරයේ රූපයක් හිතේ මවාගන්නවා ඇත්ද........ ?

අපි මේ තව කෙනෙකුට කියන්නේ අපේ දුර්වලකම් , අපේ රහස් නේද …..?

මේ අහං ඉන්න කෙනා කවදාහරි දවසක අපිව වේදනාවට ලක්කරන්න අපි මේ කියන දේවල් යොදාගනීවි නේද …..?

අපි එහෙම හිතන්නේ නෑ නේද ?

පස්ස බිම ඇනුනම තමයි සමහර අයට මොලේ පෑදෙන්නේ . හරියට මට වගේ .

මම තව උපදෙසක් දෙන්නම් කැමතිනම් ගන්න .

තමන්ගේ හිතේ දුක කාටහරි කියන්න හිතාගෙන ඉන්නවානම්. ඒ ගැන තමන්ට වඩාත් විශ්වාසවන්තම. තමන්ට සමීපතම මිතුරෙක් කියලා කටක් ඇරලා කියන්න පුළුවන් අයෙකුට විතරක් කියන්න . එහෙම කෙනෙක් හොයාගන්න බැරිනම් . යන්න ගිහිං ගහක බෙනේකට කියන්න. නැත්නම් ගොළුවෙකුට කියන්න.එහෙම පරිස්සම් උනොත් අනාගතේදී මට වගේ පසුතැවෙන්න . ඔයගොල්ලොන්ට සිද්ධවෙන එකක් නෑ !.

ඔයාගේ හිතේ සතුට නැතිකරගන්න එපා !

ඔයාට අනින්න පිහියක් කාගෙවත් අතකට දෙන්න එපා !

පුළුවන්නම් මෙහෙම කරන්න .මොන දුක මොන ගැටළුව ආවත් ඉවසන්න . දරා ගැනීමේ ශක්තිය ඇතිකරගන්න .

දුකක් ආවම ඒක කොලේක ලියන්න..

ලියලා ඒක ගිනිතියලා දාන්න !

බැරිම තැනක් ආවොත් අඬන්න .

හැබැයි එක පාරකට වඩා අඬන්නත් එපා !

කාටවත් පේන්න අඬන්නත් එපා !

ඔයා බොන්න පුරුදුවෙච්ච කොල්ලෙක් නම් “දාපං අඩිය කරටි කැඩෙන්න” කාටවත් කියනවාට වඩා ඒක හොඳයි ….

ඉතිං මගේ කියවිල්ල ඉවරයි .. එයාට බයේ මම මේ බ්ලොග් එක නවත්වන්නේ නම් නෑ !

මම දැන් හිතාගත්තා මම ලියන ඒව වෙනස් කරන්නෙත් නෑ . මොකද ඒ දේවල් මගේ ! මම ලියන්නේ මගේ දේවල් . බලන්නේ ඔයගොල්ලෝ..

අද ඉඳලා බ්ලොග් එක ලියන එක වැඩි කරන්න ඕන …!

කස්ටියටම ජයවේවා !!

සඳරු //

 *****************************************************************************

ආදරනීය ඔත්තුකරු .ඔයා මේ බ්ලොග් එක බලන බවත් මේකේ තියන දේවල් තැන තැන කියන බවත් මම හොඳටම දන්නවා . ඔයාට ඒ දේවල් කාටවත් කියන්න එපා කියලා මම කියන්නේ නෑ . මොකද මට ඒතරම් බාල්දුවෙලා පුරුද්දක් නෑ !

මම මෙහෙම කියන්නම් . ඔබතුමා ආයෙත් හිස් අහසට ගොඩ වදින්න එපා ! ..

මම තවමත් තරමකට හරි ඔබගේ යාළුවෙක් නිසා මේ විදිහට කියන බව මතක තියාගන්න