යකඩ බජාර් එකේ ලවු ස්ටෝරිය .2

        යකඩ බජාර් එකේ ලවු ස්ටෝරිය පළමු වෙනි කොටස පල කරද්දී මගේ බ්ලොග් එකේ ඇති වෙච්ච වරදක් නිසා . මේක අනික් අයගේ බ්ලොග් රෝල් වල යාවත්කාලීන වෙලා තිබුණේ නෑ . ඒක නිසා පළමුවෙනි කොටස නොදැකපු කෙනෙක් ඉන්නවානම් මෙතනින් ගිහිල්ලා ඒ කතාව බලන්න …

  

පහු ගිය කොටසේදී අරවින්ද මට කිය කියා හිටියේ යකඩ බජාර් එකේ සුමුදුගේ මල්ලි ගැන .මගේ පිට දිගේ දාඩිය බින්දුවක් ගලාගෙන යනවා මට දැනුණා .! "අම්මට සිරි යකඩ බජාර් එක........!” මම ඒ ගැන හිතලා ඉවර වෙනකොටම . අරවින්ද මෙන්න මෙහෙම කිවුවා.

   

"මචං සඳරු ඒ කෙල්ල සුමුදුලාගේ නංගි ! …. “

 මාව වෙවුලලා ගියා . මගේ අතවලටයි යටි පතුල් වලටයි දාඩිය ඉනුවා එක දිගටම . ඇයි දෙයියනේ ! යකඩ බජාර් එකේ කෙල්ලෙක් විතරමද මූට ලවු කරන්න හම්බ උණේ ?........මොකද්ද ඒ යකඩ බජාර් එක ? යමු මම කට්ටියටම යකඩ බජාර් එකත් පෙන්නලා දෙන්නම් .

 අපේ ටවුන් එකේ තියන ඔරලෝසු කණුව ගාව වටරවුම ළඟ ඉඳලා දකුණු අත පැත්තේ අන්න අර පේන වැව දිහා බලනකොට අදටත් අර වැවට උඩහින් පේන්නේ යකඩ බජාර් එක …. කැමරාවක් මගේ ළඟ තිබුණත් යකඩ බජාර් එකේ ෆොටෝ එකක් ගහගෙන එන්න තරම් අමාරුවක් මට තිබුණේ නෑ. .ඉතින් ඔයාලම යකඩ බජාර් එක හිතෙන් මවාගන්න .මම උදවු කරන්නම් .

  

ටකරන් හෙවිලි කරපු වහලවල් වලින් බිත්ති වලට ගහපු ඉටි රෙදි කාඩ්බෝඩ් වලින් වට කරපු. ගෙවල් 30 විතර තියන කොලනියක් අපේ වැව පිටිපස්සේ සරුවට වැඩුණු අන්දර ගස් හෙවනේ දැන් ගොඩ කාලෙක ඉඳන් තියනවා . ඒ ගෙවල් වල වහලය වගේම බිත්තිත් කහ පාට මිශ්‍රවුණු සුදු පාටයි . කවුරුවත් සුදු හුණු ආලේප කරල නම් නෙවෙයි . අන්දර ගස් උඩ හිටපු කාක්කෝ දහස් ගාණක් තත්පරයක් පාසාම හෙළන කාක් බෙටි වලින් නෑවිලා තමයි කොළණිය ඒ විදිහට සුදු පාට උණේ …හිතෙන් මවා ගන්න හරිම අපිරිසිදු කොලණියක රූපයක් …...

 යකඩ බජාර් එකේ හිටපු මිනිස්සුන්ගේ වැඩත් කොළණිය වගේම තමයි හරිම අපිරිසිදුයි .යකඩ බජාර් එකේ පිරිමින්ගේ ප්‍රධාන ජීවනෝපාය හරිම වෙනස් වර්ගයේ එකක් . ඒ ජීවනෝපාය තමයි ඇපේට කැපවීම ! ඇපේට කැපවෙනවා කියන්නේ. යම් කිසි වරදක් කරලා පොලීසියට මාට්ටු වෙලා උසාවි යන්න වාසනාව ලබපු අයට ඇප දෙන්න ඉදිරිපත් වීම . තමන්ගේ කෙනෙක්ට ඇපයක් ඕනෑ උණාම කෙනෙක් කෙළින්ම දුවන්නේ යකඩ බජාර් එකට . එතන ඉන්නවා මුදලට ඇප වෙන්න කැමති කට්ටිය ඕන තරම් .ඒ කෙනෙකුට රු 1000 , 15000 , දුන්නම කෙළින්ම උසාවියට ඇවිල්ලා අර වැරදි කාරයා වෙනුවෙන් ඇප වෙනවා .! . ඔන්න යකඩ බජාර් එකේ පිරිමින්ගේ වැඩ

  

ඊළඟට යකඩ බජාර් එකේ ඉන්න ගෑනු .මම උන්ට යකඩ ගෑනු කිවුවොත් ගොඩක්ම නිවැරදියි !. මී කිරි විකුණන එක මේ යකඩ බජාර් එකේ ගෑනු අයගේ ප්‍රධාන ජීවනෝපාය . මම ඉන්න පළාත මීකිරි වලට හොඳ ගොඩක් ප්‍රසිද්ධ පළාතක් . රුහුණ නම් නෙවේ . වෙන පළාතක් .කිරි විකුණන එකට ඇප වෙන එකට අමතරව . මේ යකඩ බජාර් එකේ අය තව තව යටි කූට්ටු වැඩ බොහොමයක් කරා කියලා කට්ටිය කතා වෙනවා . ඒත් මම ඒවායේ ඇත්ත නැත්ත මෙතන කියන්න බලාපොරොතු වෙන්නේ නෑ

 අපේ නගරේ තිබුණු අනවසර ඉදි කිරීම් කොයි තරම් කඩලා බිඳලා දැම්මත් යකඩ බජාර් එකට අතක් තියන්න හයි කාරයෙක් කවදාකවත් හිටියේ නෑ . යකඩ බජාර් එකේ මිනිස්සුන්ගේ එකමුතුකමට මගේ මුලු ගමම බයයි පොලීසියත් බයයි !. යකඩ බජාර් එකේ එකෙක් ගේමකට බැස්සොත් . මුලු බජාර් එකම එතනට එකතු වෙනවා .වලියකට යනකොට ගෑණුයි පිරිමියි සේරම වලියට බහින්නේ කැති උදලු අරගෙන ශ්‍රමදානයකට යනවා වගේ . බලන්න ලස්සනයි ! ….ඉතින් ඔන්න යකඩ බජාර් එක ! ගැන කෙටියෙන්ම කල හැඳින්වීමක්

  

ඉතින් ඔන්න ඔය වගේ මරු වැයික්කියක දාමරිකයෙක්ගේ නංගිත් එක්ක මගේ මිත්‍රයා අරවින්ද බොහොම තදින් පැටලැවිලා හිටියා . ඒ වෙගේ තැනක කෙල්ලෙක් එක්ක පැටලැවුණොත් වෙනදේ මම මට පුළුවන් ජාති දාලා අරවින්දට පැහැදිලි කරන්න උත්සාහ කරා . ඒත් ….. පලක් උණේම නෑ . මම විනාඩි 10 විතර මූට තේරුම් කළාට පස්සෙත් මූ කියන්නේ "අනේ මට ඒකිව අමතක කරන්න බෑ බං කියලම විතරයි" බැරිම තැන මම තීරණය කළා මගේ හොඳම යාළුවා වෙනුවෙන් මේ ලවු කේස් එකට සම්බන්ධ වෙන්න.. අරවින්දට පුදුම සතුටක් දැනුණ වග උගේ මූණ දිහා බලපු මම දැනගත්තා . මටත් කොහෙන්දෝ අමුතු ගැම්මක් ආවා . "බලමු එහෙනම් යකඩ බජාර් එකත් එක්කත් හැප්පිලා .” මම හිතන්නේ මගේ ජීවිතේටම ගත්ත දෙවැනි මෝඩ තීරණය තමයි ඒක . අදටත් මම ඒ ගැන පසුතැවෙනවා..!

  

අරවින්ද සෙට් කරගෙන හිටපු කෙල්ල අපේ නගරයේ ප්‍රසිද්ධ විදුහලක තමයි ඉගනගත්තේ . අපි ඒ කෙල්ලට සමන්ති කියලා කියමු . සමන්තිටයි අරවින්දටයි හම්බවෙන්න ලැබුණේ දවසට විනාඩි 20 පමණ කාලයක් විතරයි ඒත් අරවින්දට ඒ ගතකරන පොඩි වේලාව බොක්කටම වැදිලා තිබුණා !

  

අපේ ඉස්කෝලේ ඉන්ටර්වල් එකට බෙල් එක ගහනකොටම මමයි අරවින්දයි හෙමීට වැටෙන් පැනලා සමන්තිගේ ඉස්කෝලේ ගාවට දුවනවා . අපේ පැත්තේ තාර පාරවල් වලට වඩා තියෙන්නේ අඩි පාරවල් ඒක නිසා කාටවත් නොපෙනී විනාඩි 5 කින් විතර අපිට ඒ ඉස්කෝලේ ළඟට එන්න පුළුවන් . අපි ඒ බාලිකා විදුහල පිටිපස්සේ වැට ළඟට යනකොට . සමන්ති එතන බලාගෙන ඉන්නවා තව කෙල්ලෝ දෙතුන් දෙනෙක් එක්ක . ඇත්තටම සමන්ති ලස්සනයි මගේ හිතත් ඒ කෙල්ල ළඟ මොහොතකට නතර උණා මොහොතකට විතරයි.! විතරමයි..!!

 . මේ වගේ කෙල්ලෙක් වෙනුවෙන් අරවින්ද බෙල්ල උණත් ගහල යනවට බය උණේ නැති එක සාධාරණයි කියලා මට හිතුණා . ඒ දෙන්නා කතා කරන අතරේ මම එතන සියඹලා ගහ යට වාඩි වෙලා සියඹලා කනවා . ඉන්ටර්වල් එක ඉවරවෙන්න විනාඩි කීපයක් තියලා . අපි ආපු පාරෙන්ම ආපහු ඉස්කෝලෙට දුවනවා ….... ඔයවිදිහට අපි හයවතාවක් නැත්තම් හත් වතාවක් විතර මේ හැංගිමුත්තම් සෙල්ලම කරා ….

 මට අද වගේ මතකයි එදා සිකුරාදා දවසක් . පුරුදු විදිහටම ඉස්කෝලේ ඇරුනා….මමයි අපේ 12 , 13 වසර සෙට් එකයි සෙනසුරාදට ක්‍රිකට් ගහන්න දිනයක් නියම කරගෙන ..ගාල කඩා ගත්ත හරක් වගේ කෑ ගහමින් ඉස්කෝලේ ගේට්ටුවෙන් එළියට ආවා ! … ගේට්ටුවෙන් එළියට ඇවිල්ලා අඩි දහයක් යන්න ලැබුණේ නෑ . වේගෙන් ආපු බයික් දෙකක් අපිව පහුකරලා පාර හරස් කරලා නතර කළා .!මම කවදාවත්

දැකපු නැති මිනිස්සු හතර දෙනෙක් බයික් වලින් බැහැලා . අපේ ඉස්සරහට ආවා .

  

"මචං ඌ තමයි සුමුදු !” අරවින්ද මගේ කනට කෙඳිරුවා ! . මම යන්තම් වත් බය උණේ නෑ . මොකද මගේ ඉස්කෝලේ 13 වසරේ නියම ගණං කාරයෝ ටික මෙතන ඉන්නවා . මගේ පන්තියේ ඉන්න හයිකාරයෝ ටිකත් මෙතන අපි ඔක්කොම 15 විතර ඉන්නවා . උං ඉන්නේ හතර දෙනයි …ටිකෙන් ටික උං ඉස්සරහට ආවා . අපේ අයගෙන් අජිත් අයියා ඉස්සරහටම ගියා ..

  

අරවින්ද කියන්නේ කවුද ? මැරයා ඇහුවා …

  

ඇයි මොකටද ? අජිත් අයියා ඉස්සරහටම ගිහිලා ඇහුවා …..ඒ ගැම්මට මමත් ඉස්සරහට ගියා..

  

අහපන් ඩෝ ! හොඳ හිතින් කියන්නේ තොපේ එකෙක් අපේ නංගිත් එක්ක ලවු කරනවා . මට පෙන්නපිය ඕකා ! ඕකුන්ගේ අම් #$%!@%$@ …... කියලා උගේ මවු බසින් මොනවාදෝ කියන්නත්

 ගත්තා ."අරවින්ද මෙතන ඉන්නවා .. පුළුවන් එකෙක් ඇවිල්ලා ඌට අත තියපං" . අජිතුත් දෙවනි උණේ නෑ ..

 ඒත් එක්කම මම බලා පොරොත්තුවෙන් හිටියා වගේ වලිය පටන් ගත්තා . දෑත බදලා දුන්න පාරකින් අජිත් අයියා පැත්තකට විසි වෙලා වැටුණා එකෙක් අජිත් අයියගේ ඇඟ උඩ නැගගත්තා.මම බෑග් එක විසි කරලා වලියට පැන්නා . අපි හැමෝම .එක ගොඩේ ගහගත්තා .අපේ කණ්ඩායමේ කට්ටිය වැඩි උණත් .අලි හතරදෙනෙක් වගේ හිටපු යකඩ බජාර් එකේ මැරයෝ එක්ක හැප්පෙන්න අපිට ගොඩක් අමාරු උණා . ඔය අතරේ අපේ ඉස්කෝලේ චිත්‍ර විෂය උගන්වන සර් පොල්ලකුත් අරං දුවගෙන ආවා එයා කීප දෙනෙකුට පොල්ලෙන් නෙලනවා. මම යාන්තමට දැක්කා . අපි විනාඩි 4 විතර ගහගන්න ඇති . එකපාරම මැරයෝ ටික බයික් එතනම දාලා පැනලා දිවුවා …...තරහෙන් හිටපු අපේ කොල්ලෝ අර බයික් වල ලයිට් කුඩුකරලා බයික් දෙකම කාණුවට දැම්මා … මම යන්තම් හුස්මක් අරගෙන වට පිට බැලුවා ….අජිත් අයියට කතා කරගන්නවත් බෑ .චිත්‍ර සර්ගේ කමිසෙත් ඉරිලා . ඒත් තාම පොල්ල අතේ …

 අරවින්දට ඇරෙන්න අනික් හැමෝටම එදා යන්තමට හරි තුවාල උණා . මේ වෙච්ච සිද්ධිය ගැන අනික් පහුවෙනිදා මුලු ඉස්කෝලෙම දැනගත්තා . උදේ රැස්වීමේදී මුලු ඉස්කෝලේම ළමයි මැදදී ප්‍රින්සිපල්  අරවින්දට කනේ පාරක් ගැහුවා.. ඒත් ඒ ගහපු කනේ පාර අරවින්දගෙයි සමන්තිගෙයි ආදරේ නවත්තන්න තරම් ප්‍රමාණවත් උණේ නෑ . අනේ එහෙම උනානම්... ඒ ආදරේ නවත්වන්න පුළුවන් උනානම් ...අදටත් මම හිත හිත පසු තැවෙනවා ..

  දවස් දෙකක් ගෙවිලා ගියා …..යකඩ බජාර් එකේ හයි කාරයන්ගේ තරම මුලු ඉස්කෝලෙම දැනගත්තා "හතර දෙනෙක් ඇවිල්ලා මෙහෙම කළා නම් දහයක් ආවොත් අපිව උස්සගෙන යයි" . කොල්ලෝ අහු මුලුවල කතා කරා …. වලියට ආවේ නැති සමහර කොල්ලෝ හිටං … බලහංකෝ මේ සඳරුවයි අරවින්දයයි නිසා අපිත් නිකං බොරුවට වලියට ගියානේ . කියලා කෙල්ලෝ ඉස්සරහා වීරයෝ වෙන්න පටන් ගත්තා … "ආයේ නම් මල්ලිලා උඹලගේ වලි වලට අපි එන්නේ නෑ .ඕක නවත්තපං නැත්තං තනියම ගුටි කාපං" …... 13 වසරේ සෙට් එක අරවින්දගේ බෙල්ලෙන් අල්ලලා බැන්නා..අරවින්ද තනි උනා ..!

  

එදා හවස මායි අරවින්දයි අපේ ගෙවල් ළඟදී හම්බ උණා අපි ඒ ළඟම යන්නේ එන්නේ නැති පාරක බෝක්කුවක් උඩ වාඩි උණා . මම සාක්කුවෙන් ගත්ත සිගරට් එකක් පත්තුකරගෙනම කතාවට වැටුණා .

  අරේ.! උඹ දැන් ඕක නවත්තනවද ?

  

ඒත් එක්කම පහළ බෝක්කුවෙන් වතුර ගලාගෙන යන සද්දේටත් වඩා සද්දෙන් අරවින්ද අඬන්න පටන්ගත්තා ….. මටත් පුදුම දුකක් දැනුණා . මම මෝඩයෙක්..! මම එදා ඒ දුකට වහල් උණා ..

  

"උඹ අඬන්න එපා බං . මම උඹ එක්ක ඉන්නවා . දැං ඔය පෙරන එක නවත්තපං" ….මම කිවුවා

 "සඳරු උඹ මගෙත් එක්ක ඉන්නවනම් මට ඒ ඇති බං ….. මට ඒකිව නැතුව බෑ බං මට උදවු කරපං.. උඹ තමයි මට දැන් ඉන්න එකම එකා . ගෙදර උංවත් මං එක්ක නෑ බං" .ඉකි ගගහා අඬන අතරේ අරවින්ද කියාගෙන ගියා …

  

මම ඒතරම් සංවේදී හිතක් තියන කෙනෙක් නෙවේ ඒත් මොකටද මන්දා එදා මම අරවින්දට උදවු කරන්න තීරණය කළා …. මොනදේ උණත් මගේ හොඳම යාළුවා වෙනුවෙන් ඉවසන්නත් මම තීරණය කළා .ඒත් මම ගත්ත තීරණේ කොයිතරම් වැරදිද කියලා මට තේරුම් යනකොට මම හොඳටම පරක්කුයි …..

  

මතු සම්බන්ධයි …....

  

සඳරු //

අවසන් කොටසට