අංග විකල මවු සෙනෙහස

        

            දරුවෙක්ව මාස ගාණක් බඩේ තියාගෙන කප්පරක් දුක් විඳගෙන ලොකු ලොකු බලාපොරොත්තු එක්ක දහසක් හීන දැක දැක හිටපු අම්මාකෙනෙක් ලෝකේ තියන දරුණුම වේදනාව විඳගෙන දරුවෙක්ව මේ ලෝකෙට බිහිකරා .! ඒ බිහි කරපු දරුවාව අතට ගත්තහම තමයි ඒ අම්මා දැනගත්තේ මේ දරුවා අංග විකලයි කියලා ! ඉතින් ඒ අම්මට මෙහෙම හිතුණොත් ?

"මේ අලුත උපන් දරුවා මේ ලෝකෙට බරක් වේවි. අංග විකලව ඉපදුණු නිසා දහසකුත් එකක් දුක් කරදර විඳීවි. මම නැතිදා සමාජයේ කොන් වේවි. ඒක නිසා මේ දරුවව මේ මොහොතේම මරලා දාන්න ඕන"

එහෙම හිතුණොත් ඒ අම්මා සාධාරණද ? , අසාධාරණද ? ඒ අම්මා මිනී මරුවෙක් වෙයිද ?, ගැලවුම් කාරියක් වේවිද ? ඒ අම්මා දිව්‍යලෝකේ යයිද?, අපායේ යයිද ? …......

මම නම් පිළිතුර දන්නවා .පහළ තියන පින්තූරයි ඒ පුංචි කතාවයි කියවලා ඔබ තමුන්නාන්සේලත් පොඩ්ඩක් හිතමුද ඒ ගැන ..(ගුසාරිස් බලලා තියනවනම් ඒක මෙතනට ගාවගන්න එපා )

මේ සිදුවීම උණේ මීට දින කිහිපයකට උඩදී.. 

මගේ ගමේ වැවු ඉහත්තාවේ නිතරම වල් අලි රංචු පිටින් ගැවසෙන එක සාමාන්‍ය දෙයක් . වල් අලියෙක් කියන්නේ අපිට නම් ඒතරම් අරුමයක් ගෙන දෙන දෙයක් නෙවේ ඒ නිසා ගමේ කිසිම කෙනෙක් නිදැල්ලේ ඇවිදින ඒ අලි රංචුව බලන්න අමුතු ආසාවක් දක්වන්නෙත් නෑ.. ඒත් ගිය සතියේ එක දවසක අපිට අහන්න ලැබුණේ මහ අමුතුම පුවතක් .

ඇතින්නක් තමන්ගේ අලුත උපන් ජුංඩි අලි පැටියව හොඬ වැලෙන් උස්සලා පොළවේ ගැහුවා කියලා ආරංචියක් .

වැව මැද මාළු අල්ලන උදවිය තමයි මුලින්ම මේ සිදුවීම දැකලා තියෙන්නේ . මාළු කාරයන්ගේ කෑගැහීම මැද තව තව ගමේ උදවිය එතනට එකතුවුණා  තමන්ගේ අලි එළවන එක්ස්පීරියන්ස් සේරම පාවිචි කරලා අලි අම්මාවයි අනෙකුත් අලි රංචුවයි කැලේට එළවලා දැම්මා ඊටපස්සේ මඩ වගුරක ගිලිලා හිටපු පුංචි අලි පැටියෙක්ව අපේ ගමේ කොල්ලෝ කුරුට්ටෝ ගම මැදට උස්සාගෙන ආවා..

 ඒ අලි පැටියව දැක්ක මොහොත මට කවදාකවත් අමතක නොවේවි ..රතුපාට ලේ වලින් නෑවිලා හිටිය ඒ පුංචි එකා කම්පනයටද කොහෙද වෙවුලනවා ...ඇඟපුරාම තුවාල ඒ මදිවට හොඬවැලෙන් කෑල්ලක් නෑ . ඒ ඔක්කෝටම හපන් !! මේ අහිංසකයාගේ ඉස්සරහ පාද දෙකම ඕනෑවට වඩා දිගින් වැඩියි !

මෙන්න මේ අංග විකල බව නිසා තමයි අලි අම්මා තීරණය කරලා තිබුණේ මේ අලි පැටියව මේ ලෝකෙට අනවශ්‍යයි කියලා ..එයා හිතන්න ඇති මේ ලෝකෙට අංග විකල අලියෙක් බර වැඩියි කියලා . ඒත් අපේ ගමේ අලින්ගෙන් බැට කාලා පදම් වෙච්ච මිනිස්සුන්ට මේ අංග විකල පැටියා අමුතු බරක් උණේ නෑ ...අලින්ට දාන්න බෙහෙත් අපි දන්නේ නැති නිසා .. අපි තුවාලවලට ගාන දම්පාට බෙහෙත් කොන්ඩිස් ගාල මේ අහිංසකයාව සුවපත් කරගන්න අපි උත්සහ කළා... අදට අපි දිනලා .ඒත් හෙටත් මේ සතා ජීවත් වේවිද ? මටනම් විශ්වාස නෑ ...

ඇත්තටම අද වෙනකොට මේ අලි පැංචා යාන්තම් සනීප වෙලා ..ඒත් තවම තත්පර කිහිපයකට වඩා හිටගෙන ඉන්න බෑ … ඉතින් හිතෙන් මවාගෙන බලන්න හිටගන්න බැරි අලියෙක් ලොකු උනාම කොහොමද ? වන ජීවී දෙපාර්තමේන්තුවට බාර දුන්නත් හැමදාම මේ සතාව බලා කියාගන්න පුළුවන්ද ?

1. බල්ලන්ගෙන් බේරන්න කාමරයක නිදි කෙරෙවුව්ව අංග විකල අලි පුංචා

2. හොඬ වැලත් තියෙන්නේ බාගෙට

3. වේදනාව ඉවසන්න බැරුව කඳුලු හලන පොඩි එකාව සනසන්නේ මම වැඩකරන ඉන්ස්ටිටියුට් එකේ මැනේජර් අයියා

 

 5. වාරු නැති දෙපයට බර දීලා අලි පැටියා මොහොතකට නැගිට්ටා

 

 6.යන්තම් අඩියක් එහාට මෙහාට ගියා

 

 

 7. මොහොතකින් වාරු නැතිව ආයෙත් බිම වැටුනා

 මිනිස්සු ඉන්නේ එකිනෙකාට උදවු කරගන්න. අපි  අලි වගේ ලොකු සයිස් නොවුනට උන්ට වඩා අපි බුද්ධිමත් .අපි එකිනෙකාට උදවු කරගන්නවා .අලියගේ පැත්තෙන් බැලුවාම ඌ හරි ඇති . ඒත් මිනිස්සුන්ගේ පැත්තෙන් බැලුවාම ඒ අලි සෙල්ලම් ගැලපෙන්නේ නෑ .අපේ එවුන්ට අපි හයියක් වෙනවා ඕන වෙලාවක බස් එකේදී පේමන්ට් එකේදී අංග විකල කෙනෙක් දැක්කම අපේ හිත් උනුවෙන්නේ ඒකයි අංග විකල ඈයොත් මේ ලෝකේ ජීවත් වෙන්න ඕන. අත පය හයිය තියන අපි උන්ව ජීවත් කරවන්න ඕන.

සඳරු //

සොඩින් නෙළුම් මල ගෙනියන
බතික් රන් පතින් දිදුලන ඇතින්නියේ
යදම් අමතකද පා බැදි විලංගුවේ

උනුන් හිසින් ඇන ඇන කොයි ලෙසිනේ කිරි බොන්නැයි
ඇතින්නියේ දරු සෙනෙහස දාලා ගියේ මන්දැයි

වටින් මහ සෙ‍නග ඇවිදින් සාධු කියා වැන්දයි
නෙළුම් මලට නොවේ නුඹට නුඹ අම්මා හින්දයි

 {අතුල අධිකාරි}


ප:ලි  .2011/මැයි /07 . වන දින පස්වරු 1.45 පමන මෙම අලි පැටියා මියගිය බව ඔබ සැමටම  දන්වා සිටිමි